English
Монголын хамгийн баруун зах хязгаар болох Казак түмний өлгий нутаг Баян-Өлгийн аймгийн Алтай таван богдын байгалийн цогцолборт газар бол өндөр уулын мөнх цас, мөсөн гол, ян сарьдаг, уулын нуга, хээрийн экосистемийн онцлогийг төлөөлсөн үзэсгэлэнт байгальтай, аргаль янгир, марал буга зэрэг хөхтөн, хойлог, тас, ёл,бүргэд зэрэг жигүүртний байршил нутаг билээ.
Баян-Өлгий аймгийн Цэнгэл суманд орших Хотон, Хурган нуурууд нь мөстлөгийн гаралтай, цэнгэг уст томоохон нуур юм. Энэ хоёр нуур хоорондоо 2 км урттай хоолойгоор холбогдох бөгөөд Ховд голыг усаараа тэтгэдэг. Хотон, Хурган нуур далайн түвшнээс 2072-2084 метрт өргөгдсөн, эргийн урт 22-23 км, өргөн 4-6 км, 50-71 км.кв талбайг эзэлнэ. Дундаж гүн 7.8-26.8 м, хамгийн гүндээ 28-58 метр хүрнэ. Хурц ногоон нуга, цэлмэг тэнгэр, цагаан цасан малгай, ногоон модон хүрэмтэй уулсын хормойг чимэглэн хөхрөх холбоо хоёр нуурын эрэгт бөмбийх казах гэрүүд зурагнаас бууж ирсэн мэт үзэсгэлэнтэй.Нуураа өгсөн алхсаар атан тэмээний алхааг сорих Тахилтын даваагаар давж, Хар салаагаар уруудан Тува нарын шүтлэгт Шивээт хайрхан ууланд хүрнэ. Энд та шинэ чулуун зэвсгийн үеийн анчид, малчдын үлдээсэн Төв Азийн хадны сүг зургийн урлагийн томоохон төвүүдийн нэгд зүй ёсоор тооцогдох олон мянган жилийн настай хадны зургийн галерейд саатан цаг хугацааг ажралгүй туулсан бүтээлүүдийн ур хийцийг бахдан шагшаарай.Мөн Алтайн сүрлэг уулсын цаст өндөр оргилууд тэдгээрийг эмжсэн Потанина,Александра,Гринейн мөсөн голуудыг харж нүд сэтгэл баясахын зэрэгцээ 4050 метр өндөртэй Малчин оргилд хүчээ сорино.
* Зочид буудалд 3 хоног
* Гэйст хауст 1 хоног
* Майханд 10 хоног
Чингис хаан олон улсын нисэх буудалд уулзана. Хотын төвийн 4 одтой зочид буудалд байрлана.
Хотын аялал: Үндэсний түүхийн музей, Цонжин болдог. Танилцах хоол.
Улаанбаатараас Баян-Өлгий ниснэ. Цэнгэл сумын нутаг, Хотон Хурган нуурын ай сав газар луу УАЗ пургон машинаар 7 цаг орчим явж Түргэний аманд кемп байгуулж хононо. /Майхан/
Энэ өдрийн үдээс өмнө байгалийн сайханд алхаж Их, Бага Түргэний хүрхрээ үзнэ. Кемп дээрээ буцаж ирээд үдийн хоолоо идсэний дараа ачаагаа машинд ачиж Хотон, Хурган нуурын эрэг даган явж, Билүү толгойд кемп байгуулж хононо. Маргааш урт өдөр болох тул бэлтгэлээ хангана. Ачаа ачих тэмээ энэ өдөр Билүү толгойд ирнэ. Машин Өлгий хот руу буцна. /Майхан/
Алхалт эхэлнэ. Арал толгойн застав өнгөрч Цагаан усны рашаан буюу Хотон , Хурган нуурын эх өөд өгсч 6-7 цаг алхана. Нуурын эхэнд кемп байгуулж хононо. Ачааг тэмээнд ачна.
Энэ өдөр Хотон , Хурган нуурын эхээс өгсч 5-6 цаг алхан Тахилтын давааны хормойд очиж хононо. Ачааг тэмээнд ачна.
Тахилтын даваа /3100м/ давж Тувачуудын нутагладаг Хар салааны эхэнд кемп байгуулж хононо. 7-8 цаг алхана.
Хар салааны эхээс уруудан алхаж Шивээт Хайрхан хүрч хононо. Эндээс Алтай Таван Богдын оргилууд, Потанин, Гринейн, Александрын мөсөн голууд бүтнээрээ харагдана.
Үдээс өмнө Шивээт Хайрханы шинэ чулуун зэвсгийн үеийн хадны зураг үзнэ. Үдийн хоолны дараа Цагаан гол буюу Алтай Таван Богдын цогцолборт газар хүрч буудаллана.
Цагаан голоос Алтай Таван Богдын бааз лагерь /3000м/ руу 18 км алхаж кемп байгуулж хононо. 5-6 цаг алхана.
Алтай Таван Богдын Малчин оргил /4050м/ авирна.
Алтай Таван Богдын цогцолборт газрын хойд хаалга буюу Ойгор луу 4 цаг алхаж бууна. Эндээс машиндаа сууж Өлгий хүрэх замаар 2-3 цаг явж, Сонгины даваагаар давж уруудаад Хөх хөтөлийн голын эрэгт кемп байгуулж хононо.
Өлгий хотод ирнэ. Баян-Өлгий аймгийн байгаль, түүх, угсаатны зүйн музей үзнэ. Оройн хоол иднэ. Гэйст хауст хононо.
Өлгий хотоос Улаанбаатар луу ниснэ. Бэлэг дурсгалыг зүйлс худалдан авна. Ардын урлагийн тоглолт үзнэ. Оройн хоол иднэ. Хотын төвийн зочид буудалд бууна.
Чингис хаан олон улсын нисэх буудлаас ниснэ.
Аяллын хэрэгцээт зүйл /Юу авч ирэх вэ?/
* Цаг агаарт тохирсон хувцас
* Алхалт болон кемп дээр өмсөх дулаан хувцас, малгай, бээлий
* Хөлд таатай аяллын пүүз
* Өндрийн алхалтын гутал
* Алхалтын таяг
* Халуун сав /1 л /
* Усны сав / 1 л /
* Sleeping bag -Аяны хөнжил / -15С /
* Нарны шил
* Толгойны гэрэл нөөц батарейтай
* Ус нэвтрүүлдэггүй ачааны цүнх / 70-80 л/
* Өдрийн үүргэвч / 10 -20 л /
* Борооны цув
* Нарны тос
* Уруулын тос
* Гэрэл зургийн аппарат
* Дэвтэр харандаа, үзэг бал
* Хэрэглэж сурсан хоол хүнс
* Хувийн эмийн сан / Өвчин намдаах эм, Халууны эм, Гэдэсний эм, Хаван хөөх эм, Даралтны эм, Цус шингэлэх витамин,
Аспириний төрлийн эм, Хуруу лент, шарх цэвэрлэх түрхлэг,спиртэн хөвөн ...гэх мэт/
* Зохион байгуулагч хариуцах нийтийн эмийн сан /Даралт, хүчилтөрөгч, халуун хэмжигч, чиг баригч, ороох боох материал/
АЯЛАЛ БАТАЛГААЖУУЛАХ БОЛОН ЦУЦЛАХ ЖУРАМ
Бид таны аяллыг хөтөлбөрийн хүрээнд, таны захиалсны дагуу, мэргэжлийн өндөр түвшинд, аюулгүй, тав тухтай, амжилттай зохион байгуулах үүрэг хүлээж, 3-4 сарын өмнө бэлтгэл ажлыг хангадаг. Гадаад болон дотоодын хамтрагч түншүүддээ таны нислэг, зочид буудлыг урьдчилан захиалж баталгаажуулахаас гадна аяллын холбогдох зөвшөөрлүүдийг урьдчилж авах зайлшгүй шаардлагатай байдаг.
Баталгаажуулалт: Аялал эхлэхээс 90 өдрийн өмнө урьдчилгаа 30 хувийг төлж аяллаа баталгаажуулна. Үлдэгдэл төлбөрийг аялал эхлэхээс 7 хоногийн өмнө төлж дуусгана.
Цуцлах: Та аяллаа цуцалсан тохиолдолд таны төлсөн урьдчилгаанаас зохион байгуулалтын зардлыг суутгаж дараах байдлаар буцаан олгоно.
30-с дээш хоногийн өмнө бол 100% буцаан олгоно.
15-30 хоногийн өмнө бол 75% буцаан олгоно.
8-14 хоногийн өмнө бол 50% буцаан олгоно.
0-7 хоногийн өмнө бол 25% буцаан олгоно.
